Экс-президент менен учурдагы президенттин тирешүүсү чоң көйгөйдүн башаты болуп калышы мүмкүн. Эки саясатчынын эмнеден улам жолу эки айрылыш болуп, эки жээкке кеткенин азыркыга чейин белгисиз, антсе да, алардын мындай тирешүүсүнө кимдир бирөөлөр түрткү болгону белгилүү иш. Кыргызстандагы эки күчтүү саясатчылардын ортосундагы чыр, албетте, үчүнчү жактын, “бешинчи колоннанын” активдешүүсүнө алып келет. Ички ыйкы-тыйкыга малынган Кыргызстанды тең салмактан чыгаруу оңойго тураары анык иш. Сырткы агенттердин да күч алып кыймылга киргенин дагы байкаса болот.
Өздөрүн оппозиция катары көргөндөр жакында ноябрь аягында Курултайдын чогулушу жөнүндө жарыялашты. Мурунку жана азыркы президентке ичи чыкпагандар чогулгандыгына караганда, бул оюнга чоң оюнчу кошулуп, Атамбаевти дагы Жээнбековту дагы дискредитация кылып, саясий аренадан экөөнү тең жок кылуу аракети көрүлөөрү анык болуп калды. Мындай болушуна эки саясатчы тең, өздөрүн өздөрү чөктүрүп аткандыгы себеп болуп калышы ыктымал. Так ушул маалда, эки лидердин командалары бирин-бири ар кайсы кинеге күнөөлөп турган чагы. Компроматтар согушу уламдан улам күч алып акыры барып, айыгышкан кармашка өтүшү турган иш экени белгилүү.
Курултайга, тагыраак айтканда курултайдын идеялык шыктандыргандарга келсек. Курултайдын уюштуруу иштерин белгилүү Кенешбек Душебаев, Эмильбек Каптагаев, Азимбек Бекназаров жана башка убактылуу өкмөттүн мүчөлөрүнөн турган белгилүү саясатчылар турат. Мындайча айтканда, Роза Отунбаеванын командасы толугу менен ишке киришти. Өткөөл убакыттын президенти, Отунбаева эзелтен эле Кыргызстан менен АКШнын достошуусун самаган көлөкөдөгү саясатчы экени белгилүү. Кыскасы, кульминациялык учурга чейин Отунбаева көлөкөдөн чыкпай көшөгө артында отуруп тураары анык. Анан дагы, ал жакында АКШга сапар менен барып келгени белгилүү. ЖМКлар анын Мамдепартаменти менен жакшы мамиледе экенин жана буга чейин АКШдан “Майданды” уюштурууга колдоо алып жүргөнүн жана анын аракеттери менен 2005-жылы жана 2010-жылы Кыргызстанда төңкөрүшгө алып келген.
Жалпак тил менен айтканда, буга чейин далай төңкөрүш жасап тажрыйба топтогон саясатчылар ишке киришти. Акыркы жылдары Отунбаева дагы, анын шериктеш саясатчылары дагы оюн сыртында калып келишкен. Ал эми алар дайыма керектүү мам. кызматка отургулары келгенин эч качан жашырышкан эмес.
Өкмөттүк эмес уюмдар дагы ишке киришти. Жакында эле, укук коргоочу, адвокат америкалык маанайдагы Нурбек Токтакунов, президент Жээнбековго компромат ыргытты. Активист анын колуна Жээнбековтун шайлоо штабынын “кара бухгалтерия” тийгенин айтып, бул документтер чындык болсо, импичмент жарыялоо керек экенин айтып чыкты. Баарынан да, Токтакунов кандайдар бир жолдор менен Атамбаевтин ишенимине кирип, экс-Премьер министр Сапар Исаковтун адвокаты да болуп калды. Мындайча айтканда, америкалык позициядагы адвокат учурдагы президентке компромат ыргытып, мурунку президенттин командасына кошулуп алды. Мунун артында Токтакуновду каржылап, аны колдоп тургандар учурда чоң саясий оюнда экенин кабарлайт.
Азыркы учурда Жээнбеков менен Атамбаевти бириктүүгө эмес, экөөнү дагы чабыштырууга багытталган сценарий иштеп атканда, эки тарапта тең жеңүүчүлөр болбойт. Ал эми Кыргызстанды кезектеги төңкөрүштүн туманы каптап, дагы бир башаламандыктын аренасына айланаары толук мүмкүн. Чоң саясатчылар түшүнүшү керек, алар өздөрү ушул конфронтация жолун тандап алыштыбы же алардын кыймыл аракетине кимдир бирөө кийлигишип жатабы?
