Кыргызстандын тышкы иштер министри Чыңгыз Айдарбеков Күн мурун Францияга болгон сапарынын алкагында Францияда жашаган мекендештер менен жолугушту. Бул тууралуу министрликтин басма сөз кызматы билдирет.
Билдирүүгө ылайык, жолугушуунун жүрүшүндө министр кыргыз жарандарынын укуктарын жана кызыкчылыктарын коргоо боюнча Кыргызстандын чет өлкөлөрдөгү мекемелеринин иши маанилүү багыт болуп санала тургандыгын белгиледи.
Францияда жүргөн Кыргызстандын жарандарына консулдук-укуктук колдоо көрсөтүү маселелери, кыргыз-француз мамилелери жана эки тараптуу кызматташуунун келечектүү багыттары боюнча пикир алмашуу болгон.
Чет өлкөдөгү мекемелердин консулдук ишмердүүлүгүн оптимизациялоонун алкагында министрлик тарабынан жүргүзүлүп жаткан иштер жана мекендештер менен байланышуу боюнча маалымат берилди.
Маданият, маалымат жана туризм министри Азамат Жаманкулов да мекендештер менен болгон жолугушууга катышкан.
