Кыргыз Республикасынын Президенти Сооронбай Жээнбеков билим берүү жана илим министри Каныбек Исаковду кабыл алды. Бул туурасында президенттин басма сөз бөлүмүнөн билдиришти.
Жолугушуу учурунда мамлекет башчысы билим берүү тармагы өлкөнүн өнүгүү процессинде маанилүү орунду ээлей турганын эске салды.
Жолугушууда билим берүүнүн сапатын эл аралык стандарттарга ылайык жакшыртуу, мектептерди сапаттуу окуу китептери менен камсыз кылуу, курулушу бүтө элек жана авариялык мектептердин абалы, билим берүү объектилеринин жетишсиздиги сыяктуу көйгөйлөргө көңүл бурулду.
Билим берүү тармагында санариптештирүү процессин тездетүү, кесиптик-техникалык билим берүү системасын өнүктүрүү жана башка маселелер талкууланды.
Исаков билим берүү тармагын өнүктүрүү жана көйгөйлөрдү чечүү боюнча көрүлүп жаткан иш-чаралар тууралуу маалымат берди.
«Өлкө боюнча мектептердин электрондук картасы жана Билим берүү башкармалыктарынын бирдиктүү базасы түзүлүүдө. Бул өлкөдөгү жалпы мектептер тууралуу маалыматтарды ыкчам алууга, кырдаалды анализдөөгө мүмкүнчүлүк түзөт», — деп белгиледи ал.
Министр белгилегендей, билим берүү тармагын санариптештирүү процесси улантылат. Билим берүү уюмдарына лицензияны электрондук жол менен берүү башталып, мектептерди интернетке кошуу иштери ыкчамдайт.
«Мектепке чейинки билим берүү тармагында өсүү тенденциясы бар, бала бакчалар көбөйүүдө. Мамлекеттик жеке өнөктөштүктү колдонуу менен мектепке чейинки билим берүү мекемелерин көбөйтүүнү максат кылуудабыз. Бүгүнкү күндө балдарды мектепке чейинки билим берүү менен камтуу 40% түзөт, аны 2023-жылга чейин 80% жеткирүү пландалууда», — деп белгиледи Каныбек Исаков.
Министр маалымдагандай, жогорку окуу жайларды эл аралык талаптарга ылайыктоо багытында стимулдаштыруу иштери күчөтүлөт. 2024-жылга чейин Кыргызстандын жогорку окуу жайларын эл аралык рейтингге алып чыгуу пландалууда.
